divendres, 21 de setembre del 2007

Lo prumèr CD de Xazzar, enfin!/ Felicitats, noi(e)s!


Ua hèra bona notícia, amics! Xazzar que vien de sortir lo son prumèr CD tant esperat! Que's titola
"Que no s'escapin els gossos". Un gos, en catalan com en lengadocian, qu’ei un can, si per cas n' ac sapiatz pas. Lo grop Xazzar qu’ei compausat de sèt estudiants de l’Escòla Superiora de Musica de Catalonha (ESMUC) . Que son: Angela Llinarés (clarineta), Ildefons Alonso (bateria), Toni Vilaprinyó (baish), Clara Peya (piano, acordeon), Noemí Rubio (violon) , Miranda Gas (votz) i Laia Serra (violon). Lo lor tot prumèr disc (o numero 0 tà ac botar a la manièra deus amics de l’Agasalla) n’a pas jamès estat editat mès que podetz escotà’u suu hialat en clicar ací. Atau, qu’auratz ua petita idèa de la lor musica. Tanben poden escotà'us sus línia folk de icatfm, l'emission deu 15 d'agost d'augan tornè transméter lo lor concert qui dèn dens l'encastre deu hestenau Tradicionàrius a Barcelona.
Los joens de Xazzar que hèn musica iniciaument d'estile klezmer, ara barrejada de folk, jazz e swing. Son un pauc los hrairs petits de Dúmbala Canalla, un aute grop qu’aimi hèra tanben. E mes que i podem audir lo Francis de Dúmbala Canalla hèr soar la trompeta, enter d’autes convidats. Son deus bons, aquèths joens ! Qu’an ganhat lo concors Sona 9 de 2006. Que cantan sustot en catalan, lhevadas quauquas cantas qui son en castelhan e quitament en francés. Las cantas son totas de la lor composicion pròpia. Dilhèu que’ns cantaran ua cançon en gascon dens lo lor futur dusau CD? Tè, que soi prèst a ajudà’us si volen compausar ua cançon en gascon! Ja sèi que legéishen aqueste blòc a còps. (Doncs, noies i nois, ja m'heu comprès, si voleu afegir un trocet o dos en gascó al vostre repertori, ara sabeu qui contactar! Una canya per pagament, què us sembla? :D)
Lo CD qu'ei editat per Kasba music. La lista deus distribuidors que i ei indicada suu site web de Kasba music. Podetz crompar lo CD sus la web de K industria. Tà França, que podetz tanben contactar mosaic music distribution. Que son a Tolosa.