dimecres, 5 de març del 2008

Anueit, l'èrba qu'ei blava (sí, sénher)

Lo banjoista Earl Scruggs (nascut en 1924) e lo mandolinista Bill Monroe (1911-1996) que son considerats a bon dret coma los fundators deu genre de musica Country coneishut coma Bluegrass. Lo mot de Bluegrass (èrba blua) alludeish a la color que prenen supausadament las pradèras au Kentucky, estat que Bill Monroe n'èra hilh. En 1938, Monroe que fondè lo grop deus Blue Grass Boys, creant de hèit lo genre Bluegrass. En 1945, Earl Scruggs qu'arrejunhó lo grop. Los dos musicians qu'estón revolucionaris cada un a la soa manièra. Earl Scrugg qu'inventè l'estile Bluegrass de tocar lo banjo 5 còrdas dab tres dits de la man dreta tustant la còrda dab la part inferiora deu dit com a la guitarra classica, en ruptura totau dab la tecnica tradicionau "clawhammer" qui consisteish a tustar las cordas dab la part superiora de l'ungla de haut a baish. La guitarra qui vedem en sòlo sus la video qu'ei la Dobro, un aute instrument emblematic deu Bluegrass.





Quant a Bill Monroe, qui auré podut pensar que la mandolina e podósse impausà's coma instrument Country? La mandolina bluegrass que's distingueish de l'italiana per la fòrma de la caisha mès lo clavièr qu'ei basicament lo medish. Lo document de la video que data de 1956.




Donc, que m'ac cau plan díser aquí: que soi un fan de Bluegrass. Aquò que remonta aus dias de l' adolescéncia .... E au dia de uei, m'agrada hèra tornar escotar los trocets vielhs de la debuta deu Bluegrass...Earl Scruggs, Bill Monroe e un grop fondat en 1957 a Washington DC e qui marquè tanben l'istòria deu Bluegrass: los Country Gentlemen. Aquí, qu'avetz la mea lista, be'n profieitatz !!!!